എഴുന്താളേ ....

 *എഴുന്താളേ ....

സീതയെക്കിരീടമായുയർത്തിപ്പിടിക്കും തീ-

നാളങ്ങൾ പാടുന്നു : 

"എഴുന്താളേ പൂങ്കോതൈ"

തീമരത്തുമ്പിൽ പൂത്ത പൂവുപോലെഴുന്താളേ ....

പൊള്ളിയേയില്ല, താഴെ ഭൂമിയും പാടു "ന്നെഴു-

ന്താളേ",യാക്കുളിരൂറ്റു വേരുകൊണ്ടെടുക്കയാൽ

തീമരം തണുക്കുന്നൂ, തണുപ്പിൻ തിരകൾക്കു

മേലെ സീതതൻ മുഖം കാണുമാറായ് തീരുന്നു.

ഉണങ്ങിയുതിർന്നേനേ തിരുനെറ്റിയിൽ തൊട്ട

കുങ്കുമം ചൂടാറ്റാനീപ്പാട്ടില്ലായിരുന്നെങ്കിൽ

സഞ്ജയിൻ എഴുന്താളേത്തണുപ്പില്ലെങ്കിൽ ദേവി-

യുള്ളു ചുട്ടിരുന്നേനേയഗ്നിദേവൻ കൈമേലേ

തീയിനെത്തണുപ്പിച്ചു സീതയെപ്പൊള്ളിക്കാതെ

ഭൂമിക്കു തിരിച്ചു തന്നോരു ഗാനമേ, നന്ദി.

*സഞ്ജയ് സുബ്രഹ്മണ്യൻ പാടിയ എഴുന്താളേ പൂങ്കോതൈ എന്ന ഗാനം കേട്ടിട്ട്