രണ്ടാം പിരീഡ്

 രണ്ടാം പിരീഡ്

ബോർഡിൽ വരക്കുന്നൂ കളമൊന്നു മാഷ്
കരിനാഗേ, കളംകൊള്ളാനിറങ്ങി വന്നരുളേ
കളത്തിൽ കുറിക്കുന്നുണ്ടക്കങ്ങൾ മാഷ്
മണിനാഗേ, കളംകൊള്ളാനിറങ്ങി വന്നരുളേ
വരച്ചിട്ട കളത്തിലേക്കുറ്റു നോക്കുന്നൂ
തറവാട്ടിൽ കളം നാലു തുള്ളിയ കുട്ടി
തലേ രാത്രി കളം മായ്ക്കാനിഴഞ്ഞ പെൺകുട്ടി.
തുള്ളി വിറക്കുന്ന കുട്ടിയെ ക്ലാസിൽ
നിന്നു പുറത്തേക്കു കൊണ്ടുപോകുന്നു
പൂക്കുല പിടയുന്ന കയ്യിൽ പിടിച്ചു
ടീച്ചർമാർ സ്റ്റാഫ് റൂമിൽ കൊണ്ടിരുത്തുന്നൂ
വിറ മെല്ലെ നിൽക്കവേ കരയുന്നതെന്ത്?
മിഴിനീർപ്പൂക്കുലയായി തുള്ളുന്നതെന്ത്?
അക്കങ്ങൾ ചിത്രോടക്കല്ലുകൾ പോലെ -
യിക്കഥയറിയാതെ ബോർഡിൽ കിടപ്പൂ