അവസാനത്തെ അത്താഴം
വിറ്റ് ഗ്രിഫിൻ (യു.എസ്.എ)
"ഉപേക്ഷിക്കപ്പെട്ട ഒരു വീടിന്റെ
പോർച്ചിൽ നിന്ന്
ആ സ്ത്രീയുടെ ബോഡി കിട്ടി"
ബുക്സ്റ്റോറിന്റെ രണ്ടാം നിലയിൽ നിൽക്കേ
മേരി എന്നോടു പറഞ്ഞു.
"അത്താഴമൊരുക്കുന്നതിനിടയിലാണ്
ചേരുവകളിലൊന്ന് ഇല്ല എന്ന്
ആ സ്ത്രീ അറിഞ്ഞത്.
അതു വാങ്ങാൻ കടയിൽ പോകുന്ന വഴിക്കാണ്
അവളെ കാണാതായത് "
പത്രവാർത്ത
എനിക്കു വായിച്ചു തരുന്നതിനിടെ
മേരി വിതുമ്പാൻ തുടങ്ങി:
"എന്താണ് ആ സ്ത്രീ
പാകം ചെയ്തു കൊണ്ടിരുന്നത്
എന്നറിഞ്ഞാൽ മതി, എനിക്ക്.
അവൾക്കു വേണ്ടി അതു മുഴുമിക്കാൻ
ഞാനാഗ്രഹിക്കുന്നു"
No comments:
Post a Comment