നിങ്ങളുടെ കുട്ടിക്കാലത്തെക്കുറിച്ചു പറയേണ്ട - വിക്കി റെയ്മണ്ട് (ഓസ്ട്രേലിയ, ജനനം: 1949)

 നിങ്ങളുടെ കുട്ടിക്കാലത്തെക്കുറിച്ചു പറയേണ്ട.

വിക്കി റെയ്മണ്ട് (ഓസ്ട്രേലിയ, ജനനം: 1949)

നിങ്ങളുടെ കുട്ടിക്കാലത്തെക്കുറിച്ചു പറയേണ്ട.

കാരണം ആരും പറയുന്നതാണത്

ഒരിക്കൽ നാമെല്ലാം വികാരജീവികൾ

മിക്കവാറും പേർ സ്കൂളിനെ വെറുത്തവർ

തോക്കുകളിൽ നിന്നു ശതകോടികൾ സമ്പാദിച്ചയാൾക്കും

സ്വന്തം അമ്മയുടെ വസ്ത്രത്തിൻ മണമോർക്കാൻ കഴിയും

ഇലകൾക്കു മേൽ വീണ മഴയും.

ഇരുണ്ട അലമാര,

പൂച്ചയോടു നിങ്ങൾ പെരുമാറിയ വിധം.

കുട്ടിക്കാലത്തു ചെയ്തതോർത്തുള്ള കുറ്റബോധം

ഒരു തരം വീരസ്യം പറച്ചിൽ തന്നെ.

ഒരു കുഞ്ഞു പ്രേതത്തെക്കുറിച്ചു

പാട്ടു പാടിയതുകൊണ്ട്

നിങ്ങൾക്കൊരപകടവും വരാനില്ല.

കുട്ടിക്കാലത്തെപ്പറ്റിപ്പറയേണ്ട.

ഇപ്പോൾ നിങ്ങളെന്താണെന്നു പറയുക.