റെയിൽവേ സ്റ്റേഷൻ ഘടികാരം
സെക്കന്റ് സൂചിക്കു തടസ്സമില്ലാതെ
കടന്നുപോകാൻ നിമിഷ സൂചിയും
നിമിഷ സൂചിക്കു തടസ്സമില്ലാതെ
കടന്നുപോകാൻ മണിക്കൂർ സൂചിയും
ഈ ക്ലോക്കിൽ അടുക്കി
ക്രമപ്പെടുത്തി വെച്ചതുകൊണ്ടു മാത്രമാണ്
കാലം എളുപ്പം മുന്നോട്ടുപോകുന്നത്.
ഇതിങ്ങനെ കടത്തിവിടുന്നതിലുണ്ട്
മനുഷ്യന്റെ ഗൂഢാലോചന.
പിടിച്ചിട്ടിരിക്കുന്ന ഈ വണ്ടിയിൽ
എത്ര മണിക്കൂറായി ഞാൻ
കുത്തിയിരിക്കുന്നു!
എക്സ്പ്രസ് തീവണ്ടികൾ
നിമിഷങ്ങൾ പോലെ
കടന്നുപോകുന്നു.
എന്നിട്ടെന്ത്,
ഈ മണിക്കൂർ വണ്ടി
എത്തേണ്ടിടത്തെത്തിയാലേ
എന്റെ ദിവസം അവസാനിക്കൂ.
No comments:
Post a Comment