അവർ എങ്ങനെ സ്വയം കണ്ടു?
ഡെൻവർ ബട്സൺ (യു.എസ്.എ)
അവൾ പറഞ്ഞു:
ഒന്നിച്ചു കൂടി നിൽക്കുന്ന
വലിയ ജനക്കൂട്ടത്തിൽ
ദാ, ആ നിൽക്കുന്നത്
ഞാനാണെന്നു തന്നെ തോന്നുന്നു.
അയാൾ പറഞ്ഞു:
സംഗീതക്കച്ചേരിക്കെത്തിയ കാണികൾക്കിടയിൽ
ശ്രദ്ധിക്കൂ,
കൊട്ടുന്ന ആ കൈകൾ എന്റേതാണ്
അവൾ പറഞ്ഞു:
ഉയരക്കെട്ടിട മുകളിലേറി
ഒറ്റ ഫ്ലാഷിൽ
നഗരഫോട്ടോ ഞാനെടുക്കും.
അയാൾ പറഞ്ഞു:
അവിടെ
ഇരുട്ടിലെവിടെയോ നിന്ന്
കൈവീശിക്കാണിക്കുന്നത്
ഞാനായിരിക്കും
No comments:
Post a Comment