ഏർക്കാട്

 ഏർക്കാട്

രണ്ടു ദിവസം ഞാൻ കാറ്റിനു കൊടുത്തു.
എൻ്റെ ചങ്ങാതിമാരുമതെ.
രണ്ടു ദിവസം ഞങ്ങൾ കാറ്റിനു കൊടുത്തു.
കാറ്റെന്തു ചെയ്തു?
കാറ്റ് ഞങ്ങളെ അവിടെത്തന്നെ കുലുക്കിവീഴ്ത്തി.
മലയുടെ താഴെ
ഒരു തീവണ്ടി മുറിയിലേക്ക്
ഞങ്ങൾ ഉരുണ്ടു വീണു.
ഞങ്ങൾ കൊടുത്ത രണ്ടു ദിവസമോ
വായുവിൻ്റെ ഒരു വമ്പൻ തിരയുടെ
തുമ്പിൽ തിരുകി
കാറ്റ്
മരങ്ങൾക്കിടയിലൂടെ പറത്തിവിട്ടു
മൂളി മുരണ്ട് ഇരമ്പി
കാറ്റിൻ്റെ കൂടെ അതു പോയി.
തീവണ്ടിയിലിഴഞ്ഞ്
തിരിച്ചു വീട്ടിലെത്തിയപ്പോൾ
ദിനമണിയുടെയോ ദിനത്തന്തിയുടെയോ
മഞ്ഞച്ച പഴന്താളുകൊണ്ടുണ്ടാക്കിയ
ഒരു കടലാസ് വിമാനം
എൻ്റെ മുറ്റത്തു ലാൻ്റു ചെയ്തിരിക്കുന്നു.
ഹരി, സജീവ് നിങ്ങളുടെ മുറ്റത്തും വന്നിറങ്ങിയോ അത്?
ലീവു കഴിഞ്ഞ് കാനഡയിലേക്കു മടങ്ങിയ ശ്രീജിത്ത്,
മഞ്ഞു വീണു കുതിരും മുമ്പ്
അവിടെയും വന്നിറങ്ങിയല്ലോ
നാം കാറ്റിനു കൊടുത്ത ദിവസവിമാനം?