യി ഷാ (ചൈന,ജനനം: 1966)

1

സുവർണ്ണ ശരൽക്കാലം

എനിക്കാവുകയില്ല
നിലത്തു വീഴുന്ന ശരൽക്കാല ഇലകൾ
തടഞ്ഞുനിറുത്താൻ.

എനിക്കാവുകയില്ല
തുറന്ന വർത്തമാനപത്രം
ഒരു ശവസംസ്ക്കാര അറിയിപ്പു പോലെ
തുടിക്കുന്നതു നിറുത്താൻ.
ശരൽക്കാലക്കാറ്റത്ത്
ഒരു വയസ്സൻ
പാർക്കുബെഞ്ചിലിരിക്കുന്നു.
നിലത്ത് അരികിൽ വീണു കിടക്കുന്നു
ഊന്നുവടി.
അയാളനുഭവിക്കുന്ന ദുരിതം
തടഞ്ഞുനിറുത്താൻ
എനിക്കാവുകയില്ല,
സോവിയറ്റ് യൂണിയൻ നാളുകളിലേക്കയാളുടെ
ചിന്ത മടങ്ങിപ്പോകുമ്പോൾ

2

രഹസ്യധാരണ


അയാൾ വന്നെന്നോടു പണം ചോദിക്കുന്നു
കാരണം എൻ്റെ തൊട്ടടുത്തു നിൽക്കുന്നു
ഒരു സുന്ദരിപ്പെണ്ണ്

ഞാനയാൾക്കു പണം കൊടുക്കുന്നു
കാരണം എൻ്റെ തൊട്ടടുത്തു നിൽക്കുന്ന
സുന്ദരിപ്പെണ്ണു നോക്കുന്നു.