ആഫ്രിക്ക ഇന്ന്
ജോസഫ് ഉഷി (നൈജീരിയ)
അവൾ പിച്ചച്ചട്ടിയുമായ് ഇരിക്കുന്ന ഒരു പിച്ചക്കാരി
വഴിവക്കത്തൊരു സ്വർണ്ണക്കൂമ്പാരത്തിനുമേൽ
പകൽ മുഴുവൻ കോട്ടുവാ വിട്ട്,
രാത്രി മുഴുവൻ കോട്ടുവാ വിട്ട്
അമേരിക്ക വരുന്നു,
വലിയൊരു സ്വർണ്ണക്കഷണം അടർത്തിയെടുക്കുന്നു.
ഒരു നാണയത്തുട്ടും കുറച്ചധിക്ഷേപവും ചൊരിഞ്ഞു
കടന്നുപോകുന്നു
ഏഷ്യ വരുന്നു, വലിയൊരു സ്വർണ്ണക്കഷണം
അടർത്തിയെടുക്കുന്നു
ഒരു നാണയത്തുട്ടും കുറച്ചു വെറുപ്പും ചൊരിഞ്ഞു
കടന്നുപോകുന്നു
ഓസ്ട്രേലിയ വരുന്നു, വലിയൊരു സ്വർണ്ണക്കഷണം
അടർത്തിയെടുക്കുന്നു
ഒരു നാണയത്തുട്ടും കുറച്ചു പരിഹാസച്ചിരിയും ചൊരിഞ്ഞു
കടന്നുപോകുന്നു
യൂറോപ്പ് കടന്നുപോകുന്നു, ഒരു സ്വർണ്ണക്കഷണം
അടർത്തിയെടുത്ത്
ഒരു നാണയത്തുട്ടും കുറച്ചപമാനവും ചൊരിയുന്നു
പിൻവാങ്ങുന്നു
എന്നിട്ട് അവളുടെ സ്വന്തം ഒറ്റക്കണ്ണൻ നേതാവിനെ
പുകഴ്ത്തുന്നു
നാണയത്തുട്ടുകൾ വീണ പിച്ചപ്പാത്രം അയാൾ വെടിപ്പാക്കുന്നു
അവളുടെ മന്ദതയെ കുറ്റപ്പെടുത്തി കടന്നുപോകുന്നു
തൻ്റെ യാചക നാട് കോട്ടുവാ വിടുംപോലെ
വഴി നീളെ ഏമ്പക്കം വിട്ടുകൊണ്ട്
