ശരിക്കും ഞാനവൻ്റെ അച്ഛനാണെന്നപോലെ
താങ് യിഹോങ് (ചൈനീസ്, ജനനം:1970)
ഒരിക്കൽ ഞാൻ വീട്ടിൽ പോയപ്പോൾ
എൻ്റെ മകൻ
അയൽവീട്ടിലെ കുട്ടിയുമൊത്തു കളിക്കുകയായിരുന്നു.
എന്നെ കണ്ടതും അവൻ
എൻ്റെയമ്മയുടെ പിറകിലൊളിച്ചു.
വിരലുകൾ വായിൽ തിരുകി ഈമ്പിക്കുടിച്ച്
അവനെന്നെ പരിചയക്കേടോടെ ഒളിഞ്ഞു നോക്കി
പരിശോധിച്ചു,
ഞാനവൻ്റെ അച്ഛനല്ലെന്നപോലെ.
എന്നാൽ അയൽപക്കത്തെ കുട്ടി
ആവേശത്തോടെ എന്തുചെയ്യണമെന്നറിയാതെ
മൂളിപ്പാട്ടുപാടി തുള്ളിച്ചാടി
അടുക്കളസ്റ്റൂൾ കുതിരയാക്കി
കൂവിവിളിച്ചു പറന്ന്
എൻ്റെയടുത്തു വരാൻ വെമ്പി
എൻ്റെ മുറ്റത്തോടിയോടി വട്ടം കറങ്ങി,
നേരമിരുട്ടും വരെ.
ഇരുട്ടിയിട്ടും അവന് വീട്ടിൽ പോകണമെന്നില്ല
ശരിക്കും ഞാനവൻ്റെ അച്ഛനാണെന്നപോലെ
No comments:
Post a Comment