വിളി
ദൂരെ ദൂരേ നിന്നും
പേരെടുത്തു വിളിക്കുന്നു
വരൂ വരൂ വരൂ
വാ വാ വാ
വാടാ വാടാ വാടാ
വിളിയടുത്തു വരുന്നു.
കയറിക്കയറിയെത്തുന്നു
ഇറങ്ങിയിറങ്ങിയെത്തുന്നു
അസഹ്യമാവുന്നു
എനിക്കു കേൾക്കാ, മെന്നാൽ
ചുണ്ടനക്കാൻ വയ്യ
എണീയ്ക്കുവാനേ വയ്യ.
മലർന്ന്.
ഇരു കണ്ണിന്നും നേരെ മുകളിൽ
ഇറ്റു വീഴാൻ പാകത്തിന്ന്
ഓരോ തുള്ളി മരുന്ന്.
വീഴുന്നില്ല മണിക്കൂറുകളായി,
വീണാലേ കണ്ണുകൾ കുളിരൂ
പേരെടുത്തു വിളിക്കുന്നു
ദൂരെ നിന്നും നിങ്ങൾ.
സ്നേഹത്തിൽ വാത്സല്യത്തിൽ
ദേഷ്യത്തിൽ സങ്കടത്തിൽ .....
No comments:
Post a Comment