മെഗ് ബെയ്റ്റ്മാൻ(സ്കോട്ട്ലാൻ്റ്, സ്കോട്ടിഷ് ഗെയ്ലിക്, ജനനം: 1959)

 മെഗ് ബെയ്റ്റ്മാൻ(സ്കോട്ട്ലാൻ്റ്, സ്കോട്ടിഷ് ഗെയ്ലിക്, ജനനം: 1959)

കവിതകൾ

1
കാരണം എനിക്കയാളെ വളരെ ഇഷ്ടമാണ്


അയാൾ എന്നെക്കാണാൻ പതിവായി വരാറുണ്ട്
മദ്യപിച്ചാൽ
       കാരണം എനിക്കയാളെ വളരെ ഇഷ്ടമാണ്

ഞാനയാൾക്ക് ചായയിട്ടു കൊടുക്കും
അയാൾ പറയുന്നതു ശ്രദ്ധിക്കും
       കാരണം എനിക്കയാളെ വളരെ ഇഷ്ടമാണ്

അയാൾ കുടി നിർത്തി
എനിക്കതിൽ വലിയ സന്തോഷം തോന്നി
        കാരണം എനിക്കയാളെ വളരെ ഇഷ്ടമാണ്

ഇപ്പോൾ അയാൾ വരാറില്ല
ഉറപ്പ്, എന്നോടു നീരസമാണ്
          കാരണം എനിക്കയാളെ വളരെ ഇഷ്ടമാണ്


2
സരളത

നിൻ്റെ സരളതയാണ് എന്നെ വലിച്ചടുപ്പിച്ചത്
നിൻ്റെ സംസാരത്തിൻ്റെയും ചിരിയുടെയും സരളത
എൻ്റെ കൈകളിൽ നിൻ്റെ കവിളിൻ സരളത
നിൻ്റെ എളിയ മധുര സൗമ്യ സരളത
നിൻ്റെ ചുംബന സരളതക്കായാണ്
എൻ്റെ ചുണ്ട് വിശന്നു വലയുന്നത്
നിൻ്റെയാലിംഗനത്തിൻ്റെ സരളത
എന്നെയൊഴുക്കിക്കൊണ്ടുപോകും