വെള്ളത്തിനൊപ്പം പോകുന്ന പൂവ്
ഉമാമഹേശ്വരി (തമിഴ്)
മരം നിറയെപ്പൂത്തിരുന്നാലും
വെള്ളത്തിനൊപ്പം പോകുന്ന
പൂ തന്നെ വേണമത്രെ
കുഞ്ഞിന്.
തന്നെ വന്നു തൊട്ട
നദീനിമിഷത്തിന്
മരമുലഞ്ഞു നൽകിയ
സ്നേഹസമ്മാനമത്.
വാടാത്തത്
കരിയാത്തത്
നിറം മായാത്തത്
വയസ്സാവാത്തത്.
ആർക്കും കയ്യിലെടുക്കാൻ വിട്ടുകൊടുക്കാത്തത്,
അതിന്റെ പൂവത്തം.
വെള്ളത്തോടു ചേർന്നു വെള്ളമാകാൻ
അതു പൊയ്ക്കൊണ്ടേയിരിക്കുന്നു.
വാശി പിടിക്കുന്ന കുഞ്ഞിനോടു
വേറെന്തു പറയാൻ?
"വെള്ളത്തിനൊപ്പം പോകുന്ന പൂ വേണമെന്ന്
നീ തന്നെ ചോദിക്ക് വെള്ളത്തിനോട് "
No comments:
Post a Comment