വിശ്രമം - ഇമ്രെ ഒറാവേസ് (ഹങ്കേറിയ )

 വിശ്രമം

ഇമ്രെ ഒറാവേസ്

(ഹങ്കേറിയ )

ബഹിരാകാശത്തൊരു ഗ്രഹം,

ഗ്രഹത്തിലൊരു വൻകര,

വൻകരയിലൊരു രാജ്യം,

രാജ്യത്തിനു മുകളിൽ നീലാകാശം,

നീലാകാശത്തിനടിയിലൊരു പർവതം

രണ്ടു പർവതശിഖരങ്ങൾക്കിടയിലൊരു താഴ്വാരം,

താഴ്‌വരയിലൊരു സമതലം,

സമതലത്തിലൊരരുവി,

അരുവിയിൽ വിള്ളൽ വീണ മഞ്ഞ്,

മഞ്ഞു വിള്ളലിനിടയിലെ വെള്ളം,

വെള്ളത്തിൽ കളിക്കുന്ന നീർനായ് കുടുംബം,

നീർനായ് കുടുംബത്തിനു തൊട്ടുമേലേയുള്ള തീരങ്ങൾ,

തീരങ്ങളിൽ ചീഞ്ഞ ഞാങ്ങണപ്പുല്ലുകൾ,

ചീഞ്ഞ ഞാങ്ങണപ്പുല്ലുകൾക്കിടയിലൊരു

നടവഴി,

മഞ്ഞുകാലത്ത്‌ ചുമ്മാ ചുറ്റി നടക്കുന്നതിനിടെ 

ഒന്നു വിശ്രമിക്കുമ്പോൾ

എന്റെ മുകളിലും താഴെയുമുള്ള

ഇവയെല്ലാത്തിനേയും കെട്ടിപ്പുണരാൻ

വെറുതേ ശ്രമിച്ച്

നടവഴിയിൽ നിൽക്കുന്ന ഞാൻ.