അസംഖ്യം

 അസംഖ്യം

പിൻമുറ്റത്ത് ചവറ്റിലക്കിളികളുടെ 

എണ്ണം കൂടിക്കൂടി വരുന്നു.

വാഴയിലയിൽ കാറ്റുണ്ടാക്കുന്ന കീറലുകൾ

കൂടിക്കൂടി തോരണമായ് ഇളകുന്നു.

കഴിക്കേണ്ട ഗുളികകൾ

ഇത്തവണ ഇരട്ടിയായി.

വിടുന്ന കീഴ്ശ്വാസത്തിന്റെ 

എണ്ണം കൂടിക്കൂടി വരുന്നു.

ഈ മഴക്കാലത്ത്

യാത്രയിൽ സമാന്തരമായ് നീളുന്ന

മലനിരയിൽനിന്നുമൊലിച്ചു വീഴുന്നു 

നിരയായ് നിരയായ് അരുവികൾ.

മഴ നിലയ്ക്കുമ്പോൾ

അവ നിരയായ് നിരയായ് വറ്റുന്നു.

കൂടിക്കൂടി വരുന്ന എണ്ണങ്ങൾ നിരന്ന്

അനന്തതയാവുന്നു.

ചവറ്റിലക്കിളികളുടെ,

വാഴയിലക്കീറുകളുടെ,

ഗുളികകളുടെ, കീഴ്ശ്വാസങ്ങളുടെ,

അരുവിനിരകളുടെ,

അവ വറ്റിയ പാടുകളുടെ അനന്തത,

അവ പരന്നുണ്ടാമനന്തത......