ഒരേ ഉത്തരം

ഒരേ ഉത്തരം

1

പിടിക്കുമ്പോൾ മൊട്ട്

കുടിക്കുമ്പോൾ പൂവ്

2

പിരിയുന്നിടം തന്നെ ചേരുന്നിടം

പറയുന്നു ചുണ്ടുകൾ ചുംബനത്താൽ.

3

കയ്യിനേറെക്കാലം വേണ്ട

കല്ലുമല വെള്ളമാക്കാൻ

4

കല്ലുമല വെള്ളമാക്കി

വെള്ളത്തിൽ തുടിച്ചു കളിക്കുന്നു

വിരലുകൾ

5

ആദ്യം തേന്

തേനൊരാണിന്

പിന്നെപ്പാല്

പാലു കുഞ്ഞിന്

കാണാത്തേന്

ആണിന്നുള്ളു വഴിഞ്ഞ്,

കാണാം പാല്

കുഞ്ഞിൻ ചുണ്ടു കവിഞ്ഞ്

6

ഏറ്റവും ഘനമുള്ള

വെള്ളക്കുത്ത് തടുക്കാൻ

ഏറ്റവും മൃദുവായ

തുണിയാലണ കെട്ടണം

7

രണ്ടു മലകൾക്കിടയിലെ -

യിടുക്കിലൊരു തുറമുഖം

തുറമുഖത്തൊരു മുഖം

8

ഞെക്കിയാൽ പൊട്ടിവിരിയുന്ന മൊട്ട്,

*അർക്കത്തിൻ ശുഷ്കിച്ച മൊട്ടല്ല

9

ഞെരിച്ചാലേ നുണഞ്ഞാലേ

മയപ്പെടൂ കാലം

10

രണ്ടും ചേർത്തുപിടിച്ചാൽ

നർത്തനമണ്ഡപമാകും

പിന്നണിയിൽ ഹൃദയം

താളം കൊട്ടിക്കയറും.

* അർക്കം = എരുക്ക്. തോലന്റെ "അർക്കശുഷ്കഫലകോമളസ്തനീ" എന്ന പ്രയോഗം ഓർത്ത്