പുതിയ ഇലകൾ

 

പുതിയ ഇലകൾ

ഓർമ്മ മങ്ങിത്തുടങ്ങുമ്പോൾ

ഒരു പുതിയ ഭാഷ പഠിക്കാൻ

ഞാൻ ഒരുങ്ങിയിരിക്കുന്നു,

ബുദ്ധി തെളിയിച്ചെടുക്കാൻ

ഭാഷ തീരുമാനിച്ചു കഴിഞ്ഞു.

അതിനായുള്ള നിഘണ്ടുക്കൾ

തണുപ്പു കാലത്തേക്കുള്ള

കട്ടിപ്പുതപ്പുകൾ പോലെ

വാങ്ങി വെച്ചിരിക്കുന്നു.

ഇപ്പോൾ ചെയ്യുന്ന ജോലിയിൽ നിന്നു

വിരമിക്കുന്ന ദിവസം

പഠനം തുടങ്ങും.

പുതുഭാഷയുടെ ഏകാന്തഭൂമിയിൽ

കുറുക്കന്റെ ഓരി

പുലിമുരൾച്ച

വെള്ളത്തിന്റെ മൂളക്കം

താഴ്‌വാരങ്ങളിൽ

നഗരങ്ങളുടെ ഇരമ്പം

നിലാമുഴക്കം .....

വഴി തെറ്റി എന്നെ കാണാതായാൽ

ഉറക്കെ പേരെടുത്തു വിളിക്കണേ

എന്നിട്ടും കാണുന്നില്ലെങ്കിൽ .....