ഏറ്റവും പിന്നിൽ

ഈറൻ തുണികളുണങ്ങുന്നതിൻ മണ-

മൂറുമിരുണ്ട മുറിയിൽ പിറന്നു ഞാൻ

എന്നതുറ, പ്പെന്റെ മൂക്കു വലിച്ചെടു-

ക്കുന്നതിന്നേറ്റവും പിന്നിലുണ്ടാ മണം.

ഈറൻ തുണികൾ തോരാനിട്ടതിന്നിട-

യ്ക്കോടിയൊളിച്ചു കളിച്ചു വളർന്നു ഞാൻ

പാതിയുണങ്ങിയിളകും തുണികൾ തൻ

പാളികളിൽ മുഖം പൂഴ്ത്തുവാൻ തോന്നുന്നു.

ലോകങ്ങ,ളീറനുണങ്ങും തുണികൾ തൻ

വാടയായെന്നെപ്പൊതിയട്ടെയെപ്പൊഴും.