ദൈവവും മോഷ്ടാവും
അന്ധനായ യാത്രക്കാരൻ്റെ ബാഗ് നഷ്ടപ്പെട്ടു. വണ്ടി ഇറങ്ങാൻ നേരത്ത് തപ്പി നോക്കിയപ്പോഴാണ് വിവരം അറിയുന്നത്. സ്റ്റേഷനിൽ ഇറങ്ങി റെയിൽവേ പോലീസിൽ പരാതിപ്പെട്ടു. പോലീസ് ചോദിച്ചു: "ബാഗിൽ എന്തൊക്കെയുണ്ട്?"
"മെഡിക്കൽ ബോർഡ് സർട്ടിഫിക്കറ്റ്. പിന്നെ എസ് എസ് എൽ സി ബുക്ക്, പ്രീ ഡിഗ്രി സർട്ടിഫിക്കറ്റ്"
"ബാഗിൻ്റെ നിറം?"
"അത്..... അതറിയില്ല"
"അറിയില്ലേ? നിറമെന്തെന്ന് ആരും നിങ്ങളോടു പറഞ്ഞിട്ടില്ലേ?"
"ഇല്ല. എൻ്റെ ഭാര്യക്കും കാഴ്ച്ചയില്ല. ആരെങ്കിലുമൊക്കെ ചിലപ്പോൾ പറഞ്ഞിരിക്കാം. പക്ഷേ ആ നിറമൊന്നും മനസ്സിൽ നിൽക്കുന്നില്ല" അയാൾ നിസ്സഹായനായി.
അന്ധനായ യാത്രക്കാരൻ്റെ ബാഗിൻ്റെ നിറം രണ്ടു പേർക്കു മാത്രമേ അറിയൂ. ദൈവത്തിനും മോഷ്ടാവിനും. അതുകൊണ്ട്, ആ ബാഗിനു നിറമില്ല. നിറമൊന്നുമില്ലാത്ത ഒരു ബാഗ് എങ്ങനെ തിരിച്ചറിയും?
No comments:
Post a Comment