മൈതാനത്തുമ്പികൾ

മൈതാനത്തുമ്പികൾ

കഴിഞ്ഞ ദിവസം
ക്ലാസ് മുറിയുടെ ജനൽച്ചില്ല്
ഇടിച്ചു പൊട്ടിച്ച്

മുഷ്ടി ചോരയിൽ മുക്കി 

തനിച്ചു നിന്ന കുട്ടി
ഇന്ന്
സ്കൂൾ മൈതാനത്തെ

ആർപ്പുവിളികൾക്കിടയിലൂടെ

ബാൻഡേജിട്ട കൈപ്പത്തി മുന്നിലേക്കു നീട്ടി
ഓടിക്കൊണ്ടിരിക്കുന്നു.

നൂറു മീറ്ററിനുള്ളിൽ
ആയിരം ജനൽച്ചില്ലുകൾ
ഒരുമിച്ചു കുത്തിപ്പൊട്ടിക്കുന്നു

മൈതാനത്തു നിന്നും പാറിപ്പൊന്തുന്ന
തുമ്പിച്ചിറകുകൾ,

ചില്ലു തുണ്ടുകൾ, 

ഇരുവശത്തേക്കും തെറിക്കുന്നു

മുഷ്ടിയുടെ ദീപശിഖയിൽ
ചില്ലുനാളങ്ങളാളുന്നു
ചോരയല്ല, കാറ്റവനെ
മുഴുവനായും മുക്കുന്നു