ചെടി

ചുമരിൽ 

ചിതൽ പടർന്നു കയറിയുണ്ടായ

പാടുകളിലൂടെ 

അവൾ

കയ്യിൽ കിട്ടിയ ചായമോടിച്ചു.

അപ്പോൾ അതൊരു 

ചെടിയുടെ തണ്ടായ്. 

ഇരുവശത്തും ഇലകൾ വരച്ചപ്പോൾ

ചെടി. 

തുഞ്ചത്തൊരു പൂവും.

ദിവസങ്ങൾ കഴിഞ്ഞു

ഇന്നു പെട്ടെന്ന് 

ചെടിയുടെ തണ്ട് 

വണ്ണിച്ചു നിൽക്കുന്നു.

നോക്കിയപ്പോൾ

ചെടിത്തണ്ടിലൂടെ അടി മുതൽ മുടി വരെ

വീണ്ടും ചിതൽ. 

അവൾ വരച്ചു ചേർത്ത 

ഇലകളുടെയും പൂവിന്റെയും

വിളുമ്പുകളിൽപ്പോലും.

വാശിയോടെ തട്ടിക്കളഞ്ഞ്

അവളിപ്പോൾ വീണ്ടും ചായം കയറ്റും.

അതുവരെ മാത്രം

ഇതൊരു ചിതൽച്ചെടി.

ചിതൽത്തണ്ടും ചിതലിലകളും

ചിതൽപ്പൂവുമുള്ള ചെടി.