രക്തപരിശോധനാ റിപ്പോർട്ട്
മാസത്തിലൊരിക്കൽ
സ്വന്തം ചോരയോടു
മുഖാമുഖം നില്പവൾ നീ.
അതിനോടു സംസാരിച്ച്
അതു പറയുന്നതു കേട്ട്
അതിന്റെയിരുട്ടും സുതാര്യതയും ശ്രദ്ധിച്ച്.
മരണത്തിനു തൊട്ടുമുമ്പ്
പുരുഷന്
അപൂർവമായി മാത്രം കിട്ടാവുന്ന
സ്വന്തം ചോരയെക്കുറിച്ചുള്ള അറിവ്
സഹജമായ് തന്നെ
വളരെ നേരത്തേ നേടി നീ.
പക്ഷേ,
സ്വന്തം ചോരയിൽ
മാസത്തിലൊരു തവണ
മുങ്ങി നിവർന്നിട്ടും,
അതു നിന്നെ
പരിചയമേ ഇല്ലെന്ന മട്ടിൽ
തളർത്തുന്നതെന്ത്?
No comments:
Post a Comment