സങ്കടം മാറുന്നതിനെപ്പറ്റി ഒരു ശാസ്ത്രപാഠം
കടൽത്തീരത്തു നിന്നു നോക്കുമ്പോൾ
ദൂരെ നിന്ന് ആദ്യം പുക
പിന്നെ കൊടിമരം
പിന്നെ മുകൾത്തട്ട്
പിന്നെ മുൻഭാഗം, അടിത്തട്ട്
ഒടുവിൽ മുഴുവനായും
ഇങ്ങനെയാണ്
കപ്പൽ കണ്ണിലേക്കു വരിക,
മൂന്നാം ക്ലാസിലെ ശാസ്ത്രപാഠപുസ്തകത്തിൽ
പണ്ടു പഠിച്ചത് പെട്ടെന്ന്
അപ്പാടെ ഓർമ്മ വന്നു.
എങ്കിൽ അതേ കപ്പൽ
തിരിച്ചു കണ്ണിൽ നിന്നു മറയുമ്പോൾ
ആദ്യം അടിത്തട്ട്, മുൻഭാഗം,
പിന്നെ മുകൾത്തട്ട്
പിന്നെ കൊടിമരം
ഒടുവിൽ പുക .....
"ഇനിയും സങ്കടം മാറിയില്ലേ?"
"എപ്പൊഴേ.
ഭൂമി ഉരുണ്ടതാണെന്ന്
മൂന്നാം ക്ലാസിലെ ശാസ്ത്ര പുസ്തകത്തിൽ തന്നെ
പഠിച്ചിട്ടുണ്ടല്ലോ"
No comments:
Post a Comment