അവരുടെ തുറസ്സ്

 അവരുടെ തുറസ്സ്

പഴയ കൊട്ടാരം. 

മച്ചറകൾ, കിളിവാതിലുകൾ

ഉയരം കുറഞ്ഞ തട്ടുകൾ, അരണ്ട വെളിച്ചം 

മരയഴിവിടവുകൾ

ഇടുങ്ങിയ ഇടനാഴികൾ

കണ്ടു കണ്ട് നടക്കേ

പെട്ടെന്നൊരു തുറസ്സിലെത്തി.

വിശാല മുറികൾ

വാതിലോളം പോന്ന

ജനാലകൾ

ഉയർന്ന തട്ട്

നിറഞ്ഞ വെളിച്ചം

നല്ല കാറ്റ്

അടഞ്ഞ കൊട്ടാരത്തിനുള്ളിലെ

തുറന്ന തുരുത്ത്.

അവിടെ ചുമരിലെഴുതി വെച്ചിരിക്കുന്നു :

ഇത് വിദേശികൾ വരുമ്പോൾ

താമസിപ്പിച്ചിരുന്ന അതിഥി മന്ദിരം.

ഇവിടെ താമസിച്ച സായിപ്പന്മാരെ

അപ്പുറത്തെ ചുറ്റിടനാഴികളിലേക്കു

പ്രവേശിപ്പിച്ചില്ലായിരിക്കാം.

കിളിവാതിലിലൂടവർ

പുറത്തേക്കു നോക്കിയില്ലായിരിക്കാം.

എങ്കിലും

കൊട്ടാരം പണിത രാജാവിനറിയാമായിരുന്നു,

തനിക്കു വേണ്ടാത്ത കാറ്റും വെളിച്ചവും തുറസ്സും

സായിപ്പിനു വേണമെന്ന്.

അതിഥി മന്ദിരം പിന്നിട്ടു നടക്കുമ്പോൾ

പിന്നെയും

കാറ്റനങ്ങാത്ത ഇരുണ്ട ഇടനാഴികൾ ...

നമ്മുടെ അകങ്ങൾ .....

കിളിവാതിലുകൾ .....