രണ്ടു കവിതകൾ - റൊണാൾഡ് ബ്രീഡിസ് (ലാത്വിയ, ജനനം : 1980)

 

രണ്ടു കവിതകൾ

റൊണാൾഡ് ബ്രീഡിസ് (ലാത്വിയ, ജനനം : 1980)

1.ജനങ്ങളോടു സംസാരിക്കുംമുമ്പ്

മരുഭൂമിയിൽ നിന്നു മടങ്ങുന്ന പ്രവാചകൻ

ജനങ്ങളോടു സംസാരിക്കും മുമ്പ്

ദാഹമടക്കാനായി

കിണറ്റിലേക്കു കുനിഞ്ഞു നിന്നു നോക്കിയതും

ഉറഞ്ഞു പോയി

തന്റെ പ്രതിബിംബം കണ്ട്.

തന്റെ തുറന്ന വായ

ഒരു പൂജ്യം എന്നു കണ്ട്.

2. നിശ്ശബ്ദത

പ്രപഞ്ച സൃഷ്ടിക്കു മുമ്പുള്ളതെന്തോ അതുപോലെ

നിശ്ശബ്ദത.

നദിക്കുമേൽ തെന്നിനീങ്ങുന്നു മൂടൽമഞ്ഞ്

തീരത്തെ കുറ്റിച്ചെടികളിൽ ചുറ്റിപ്പിണയുന്നു.

മഞ്ഞുതുള്ളി വിറകൊള്ളുന്നു, ഒരു ചില്ലമേൽ.

ഒരു മൊട്ട് പൊട്ടിവിരിയുന്നു.

കുഞ്ഞിക്കിളികളനങ്ങുന്നുണ്ടൊരു കൂട്ടിൽ

ആദ്യത്തെ വാക്ക് പറയപ്പെടും മുമ്പുള്ളതെന്തോ അതുപോലെ

നിശ്ശബ്ദത.

പള്ളിമണികൾ അവയുടെ നാവുകളെ നക്കുന്നു.