മുഖച്ചാട്ടം

 മുഖച്ചാട്ടം

(പട്ടാമ്പി ഗവ. ഓറിയന്റൽ ഹയർസെക്കന്ററി സ്കൂളിലെ സഹപ്രവർത്തകർക്ക്)


താഴെയൊരു താന്നിമരമുണ്ട്
വേരുകൾക്കിടയിലെപ്പൊത്തിലൂടതിനുള്ളി -
ലേറി മേൽപ്പോട്ടു നോക്കുമ്പോൾ
മുകളറ്റത്തോളവും പൊള്ള.
കിളികൾ കൂടും വെച്ചിരുന്ന പൊത്തിൻ തുളകൾ
വഴി വന്നു വീഴുന്ന വെയ്ലിൻ
പുക പാറിടും കീറുകൾ തട്ടി മിന്നുന്നു
ഗുഹപോൽ മരത്തടിയ്ക്കുള്ളം
ലോകം വിരിവതിൻ മുമ്പത്തെ മുട്ടകൾ
നീന്തുന്നിതാ വെളിച്ചത്തിൽ

മേലെയൊരു നീർച്ചാട്ടമുണ്ട്
മലകേറി വമ്പൻ കിതപ്പുകൾ കേറി നാ-
മതിനടിയിലെത്തി നിൽക്കുന്നു.
ഉയരത്തിലേക്കുറ്റു നോക്കെച്ചലിക്കുന്ന
ജലസൗധമൊന്നിന്നു താഴെ
ചെറിയോരൊതുക്കുകല്ലിൽ പറ്റി നിൽക്കുന്നു
ജലസസ്യമെന്നപോൽ നമ്മൾ

കൈഫോണിലൊരു മുഖച്ചാട്ടം.
പൊള്ള മരത്തിന്റെ പൊത്തിൽ നിന്നും ഞെങ്ങി
നാം പുറത്തെത്തും പടങ്ങൾ...
മേലെ നിന്നും പോന്ന നീർച്ചാട്ടമാപ്പൊത്തി -
ലൂടെ വെളിപ്പെടും പോലെ ...