കണ്ണ്
പഴയ കാലം
എങ്ങനെയെങ്കിലും തിരിച്ചു കൊണ്ടു തരണേ
എന്നു കൂപ്പി പ്രാർത്ഥിച്ചു കൊണ്ടിരുന്നു
ഇരു പഴയ കൈ.
പ്രാർത്ഥനയിൽ നിന്നുണർന്നു നിവർന്നപ്പോൾ
ചുറ്റിലുമെല്ലാരും
പനിച്ചു മയങ്ങിക്കിടക്കുന്നു.
സമയമായി എന്നുറപ്പിച്ച കൈ
അടുക്കളപ്പാത്രങ്ങളിൽ നിന്നു
കടുകും മുളകും എടുത്തു പിടിച്ച്
ജപിച്ച്
പനിച്ചു കിടക്കുന്നവരെ അടിമുടിയുഴിഞ്ഞ്
അടുപ്പിലിട്ടതു പുകച്ചു.
പഴയ കാലത്തിന്റെ മടങ്ങിവരവു
വീണ്ടും വീണ്ടും മണത്ത്
ഒച്ചവെച്ചു:
"ഞാനന്നേ പറഞ്ഞതല്ലേ
ഇതൊന്നും ചെയ്യാഞ്ഞിട്ടല്ലേ
വില വയ്ക്കാഞ്ഞിട്ടല്ലേ
ഇപ്പോൾ കണ്ടോ,
കടുകും മുളകും പുകച്ചിട്ട്
ഒരു മണവും വരുന്നില്ല"
